Platt-Satire

De Advenz-Katastroof vam Oembärch

Ssunndaach, dän easten Advent, Uurer tehn. In dä Hüüser vam Ömberg lööt dat Rentnerwief Erna Rosendahl öaren Inkel Krischan dre-i ’lektrische Kääze oppe Finsterbank van öar Staatzstööfken opstelle. Krisdaachsstimmung bre-it sseech ut, un de Fröid ös waal chroat.

10.14 (teen Uhr vierteen)
Ees he ssinne Aaffall inne Aaschetunn kippe deit, ssüht dä Nober Kaal Pieper die dre-i Kääze im Neewenhuus branne un löp chau in dä Keller öm ssin hollainsche Kääzessett mit ten Aame, jedere-in 15 Watt, im Köökefinster uttestelle.
En paar Stoune laater stroahlt die chanze Ömberg-Ssiedlung öm innige Chlanz van 134 ( hounentfierundattich) Finsterlööchte.

19.03 (negenteen Uhr dre-i)
Bei de RWE ssüht dä Ingenieur, dat op däm Meetcherät föar dat Chebiet aan de Flaasroote dä Wiiser nee meah tu sseehne ös. He dink ssech nicks dobe-i.

20.17 (twintich Uhr sewenteen)
Männe un Mieke Easteroug vam Elsässer Wääch chelingk dä Aanschlut van en Ketteschaltung van 96 (ssäässunnegentich) Halogenfilmlööchte döar de chanze Böim vam Obbs-Chaade. En chanzen Houpe van Vöögel kumme düare-in un fange aan Neester te baue.

20.56 (twintich Uhr ssääsunfieftich)
Dä Diskothekenkääl Olf Böilerbaas kann ouk nee meahr auners. He fängk aan, op däm platte Daak van ssinem Bungaloff dat Le-iser-Chedöns „Metropolis“, wat met dat stärkste in Europa ös, te montiere.
Dä Toon vanne Christuskiirke in sinne Noberschaaf häult dat en paar Minnute ut, dann fällt he mit en chewäuligen Dunner in Reechtung Waldbleeke tessame.

21.30 (e-inuntwintich Uhr dattich)
Em Trubel van en Joule-Club-Fiier be-im RWE che-iht dat Alarmchehüll van de Ömspannstation am Bühlsbeek vollstainig ouner.

21.50 (e-inuntwintich Uhr fieftich)
Dä 85-jöhrige Kreegsveteran Chüs Strammka zaubert met 190 Flakschienwerpers vam Typ „Varta Volkssturm“ dän Stään van Bethlehem an die deephangende Wolkedeck öwwer Ssaan.

22.12 Uhr (twea-un-twintich Uhr twälf)
Ene Trupp asiatische Haunelslüüt mit leech Chepäck un Kle-ider wie im Ssummer löpp bang döar die Stroote vanne Ömberg-Siedlung:
Derweege dat dä Aärbus A 380 (dre-iohounentaachtich) noh Sydne-i sseech be-im Aanflug op dän Düsseldörper Äärpoot verkeeke heet un in die met dre-i dousend Neonröhre cheplaasterte Charageinfahrt vam Hennes Heuop chelandet woar.

22.37 (twea-un-twintich Uhr sewen- un-dattich)
Die NASA-Raumssond Weu-itscher 7 (seven) funk vam Raun van use Milkstroote Belder van en Ssuupernova op use nördliche Äädhalfkugel. Die Experte in Juusten we-iten sseech ke-ine Root.

22.50 Uhr (twea-un-twintich Uhr fieftich)
En leech Beewen schockelt die Ääd round öm die Ömspannaanlag am Bühlsbeek.
Die chanze Anlage löpp met 350 Megawatt all öwwer däm, wat se chrad noch verdraage kann.

23.06 Uhr (dre-i-un-twintich Uhr ssääss)
In dä daachhell lööchtende Ömberg- Ssiedlung wäad die Studentin Mieke Bellscheidt wackrig un fröid ssech, weege dat se chlöiv, dä Dezember-Morge wöar ssoa hell un ssunnig. Se löpp inne Kööke un de-it dän Schauler van öare Koofemaschien ni-erdöie.

23.12 Uhr – und 14 Sekunden (dre-i-un-twintich Uhr twälf un vierteeen Sekunde)
Im chanz Ssaan woar et techlicks duuster. Un chlicks drop explodierden die Ömspannaanlag am Bühlsbeek mit en chewäuligen Dunnerschlag!
Döar de Stroote va’ Ssaan loupe Minsche ees innem Dollhuus, Minsche ees dou un ick, die met’m Advenzkranz nee tufrie-e woaren!

Quelle: 1.Hochdeutsche Vorlage eines unbekannten Autors im Internet: „Besinnlicher Advent“
2.Übertragung und Umformungen von Franz B. Firla, 2006