ne Frönd, ne Frönd, ne jode Frönd

De Bondesbaas-Ihresold jeht zoröck op dat Johr 1953. Domols wollden CDU/CSU dä Adenauer jähn als Kanzler losswehde. Em enfachsde wöret, so die chresslechen Schlickefänger, wemmer dat Bondespräsedenteamp so lukratev mache, dat hä so e Anjebot nit aflenne kann. Also hannt se per Jesetz beschlosse, dat ne Ex-Bondesbaas läwenslang so vill an Kohle kritt wie sinn Ampsbe-zöch. Zoehsch hät däm Adenauer dat och jelockt. Dann es hä trotzdäm dovon widder afjeröckt, weil hä als Präsedent nix ze benedeie hät on nor Jrößonkel wör. Zengerdäm es dat so jebleewe.

Nem Bondesbaas, dä vörziedich ussem Amp scheide deht, steht de Ihresold mar dann zo, wenn de Röcktrett entswäder us pollitesche odder us jesondheetleche Jrönd erfolcht es. Em Fall Wulff es de wessenschaffleche Deenst vom Bondesdach zo dem Erjävnes jekomme, dat dä Wulff us persönleche Jrönd zorockjetrode sei. Deshalv stönd em de Ihresold nit zo. De Crux es jedoch, dat dat Bondespräsedejalamp do de Entscheidongsbefochnes hät. On do hät dä Wulff jo sinn Frönde: Höttes Ruddi on Hareböllings Loddar. Die hannt befonde, dat hä us pollitesche Jrönd zoröckjetro-de wör. Somet stüng em de Ihresold zo. Bedenklech, dat die Entscheidong nit justezjabel es.

Bei de Jeschecht met dem Jrote Zappestreech drängt sech de Froch op, wie blöd moss mr eejens-lech sinn, öm nit ze merke, wenn e Jeschenk verjifdet es. Dat Anjebot von de-Mäzjeers Loddar, emm wie weiland däm Jauner Juttenberch ne Jrote Zappestreech blose ze losse, es so e Danaer-Jeschenk. Stellt hä sech doch met dem en deselve Reih. On dann die Blamasch, dat dozo nit eene von sinn Vörjängers kömme deht. Von de Polletik komme mar die, die et qua Amp mösse.

Nix för onjot.
Steins Charle-Manes