Ripuarischer Nachtwächter 1

Dr Nähtswäschter

Franz von Dingelstedt mit Dank und Verehrung fürs Voräffen

Frau, dunn mr et Wöbche met däm Logo
van usem Dörp – esch muss jitz weg.
Esch koof mr ungerwäjs nen To go
un pröff mr spöder nen Big Mäck.
Schleeß alles avv, dat se nix stelle,
un stopp se en et Bett, die Blare –
ich muss jitz jonn un dauernd brölle:
Höht, Ür Häre, loht ösch sare.

Ür dürft en öre Keste ratze
un wat esch roof, ess ösch ejal,
de Uhrzigg deht ösch och nit kratze,
nä, ösch kratz jarnix, klore Fall.
Treckt ösch et Plümmo üvver’t Köppche,
su, da ür fott sid, suzesare,
strischt ösch dr Baht oder et Zöppsche –
für ösch hät et nix jeschlare.

Loht ösch em Schlof van jarnix stüre,
van schlähte Drööm un su nem Mess,
un solld ür doch e Füzzje spüre,
dankt Jott, dat et nix Schlemmes ess.
Un ploren ösch selvs schlemme Sorje,
maht ösch kenn Sorje, dat verjeht,
die künne wahde bes zöm Morje –
passt op op‘t Für – bewahrt et Leht.

Doht nit an’t Rebelliere denke
un wälzt ösch nit eröm em Bett,
loht ür Jescheck van bovve lenke,
do weeß mr immer, wat mr hät.
Denkt nit an Kühme, Nut un Jammer –
schloft! Jeder, wo hä hinjehöht,
dr Hongk em Stall – ür en dr Kammer,
domet nix durchereen jeröht.

Un wenn dies Näht wie alle Nähte
ihr Ründsche öm de Uhr jedrieht,
kruft us där Kess mem Been, däm rähte
zoeesch. O'm Mess dr Kitzhahn krieht –
su sall et sin em janze Städtsche,
kooft flögg noch BILD för de Beliehrung
un klömmbt en öjer Hamsterrädsche
un dankt all Jott un dr Rejierung.