Chressdaachsverzäll op Platt 1

Em web jefonge un ömjefrickelt - en Chressboomsgoogle

Poss van dr Mutter vür de Chressdaach

Leev Kenger,
dies Johr mütt ür ohne de Mutter klorkumme, ich ben üvver de Fierdaach verreis. Et feel mr jet plötzlich enn – ävver alt lang möht ich eemol Chressdaach fiere op ming eejene Aht. Üre Vatter kunnt ich zo sujet nit bekalle, hä bliet dobei, dat mr ze Chressdaach en et eeje Denge jehöht. Also künnt ür wie immer bei us kumme, ür wesst jo, wie dat Fess traditionell un zigg Johre immer op deselve Aht avlööf. Drömswelle weeß ich sescher, ihr kritt dat och ohne mich op de Reih.
För jet parat ze maache hatt ich kenn Zigg, weil ich ming Plünne packe moht, ävver drei van öch sin jo perfekte Husfraue, die mir bei jeder möchlijje Jeläjenheet un bei jedem Rezepp jood jemeente Tips jedäut hant, wie sie dat maache wöhden. Wann ür wollt, künnt ür dies Johr jo öch ens ungereen helpe.
Ür Zemmere für ze schlofe kennt ür jo, do brucht ür bloß noch ze putze un opzerühme. Die Jästebedder van dr Frau Hansen hengen om Sandberg künnt ür och dies Johr jelinnt han, ür brucht se nur die zwei Kilometercher ze schleefe. De Bettwäsch lit bovven em Kleederkass, die paar Bedder betrecke maht ür doch met lenks.
Wat et an dä Fierdaach ze schmürmele jüt, kann ich öch jo nit vürschrieve, un drömswelle han ich och ens nüx enjekoof. Wat mr su an Krom för zwölf Persone bruch, künnt ür öch usrechne: viermol suvill wie öre eejene Bedarf drheem.
Met mingem Enkoofswäjelche moht ich jo e paar Mol nom ALDI un nohm LIDL jöcke, ävver dat maht ür jo met dä jruße Kombis en eenem Rötsch. Ich hoff, die Jetränkekeste sin öch nit ze schwor, draht se immer ze zwedd – un denkt dran: dr Papp drenk jähn Weizen, dr Olaf Cola leit, dr Sascha Appelsaff und et Annekatringche nur FANTA – ävver, wäm sach ich dat? Ür hatt mir doch immer beizigge klor jemaht, wat ür do för Vorliebe hatt.Vielleech joht ür ävver och leever en dr Wehtschaff esse, weil -drheem muss immer jespölt wähde. Ovschuns: wann se all met anpacke hält öch dat höchstens en halve Stond vam Fernsehe av. Wann ür drheem esse doht, nemmt räuhisch dat joode Jescherr us däm Schaff. Ich weeß jitz, wo ich nohbestelle kann, wat ür an Postelling kapott jemaht hatt. Nävver de Zuppetasse litt dr Kataloch met de Priese. Wann öch jitz also jet ze Broch jeht, künnt ür tireck nohlure, wat dat Deel neu koss, un die Ungertass op däm Kataloch steht do för et Jeild drenn ze dunn. Un noch jet: Dat klotzisch düre Servies met däm Joldrand darf nit en de Mikro.
Leev Kenger, Chressdaach ohne Boom es doch halve Krom. Domet et Hellije Ovend nit ohne Nolde dosteht, kooft ür et Böömche am beste op dr letzte Stipp. En dr Ständer prakeziere es nit esu janz eefach, drömswelle hät dr Vatter dat immer mir üvverlohße, dofür kunnt hä ävver tireck sinn, wann dr Boom nit jrad stungk oder söns jet ze kritesiere wor.
Dr Boomschmuck litt em Keller henger dr Äpelskess, doht dies Johr de elektrische Kähze nemme, an dä Brandflecke vam letzte Johr kann ich mich jitz noch immer widder huhtrecke.De Kenger dunt secher jähn jet laut em Wonnzemmer spille, loht öch nit bem Fernsehe stüre.
Joht ür met de Kenger ens en de Chressnäht? Wie jähn wöhd ich do ens widder hinjonn, ävver für öch es dat ja „ahle Krom“, un för alleen durch et Düstere ze jonn ben ich ze bang.
Wat mr e bessje Sorje maht: Wer brängk dann bei üre politische Dikussione widder dr Fridden en et Schmölzje, wann ich nit do ben? Mem Vatter bruch mr do nit ze rechne, wann et laut wöhd, verdröck dä sech en et Schlofzemmer. Dä weeß, wie mr sing Nerve intack hält.
Wann ür öch jäjensiggisch de Maniere van de Pänz und ür Erziehungsmethode öm de Uhre haut, dann kritt et met dr Rauh. Jeder maht do Fähler, wer weiß dat besser wie ich? Ävver et is nie ze spoht för Korrekture vürzenemme.
Sescher frocht ür jitz, woher ich et Jeild han för sun Toure ze maache. Janz eefach: Wat ech söns für Jeschenke für öch usjejovven hädden, dat finanziert mir jitz Fahrt un Loschie. En de meeschte Fäll treff ich mit ming Chresskengkcher jo doch nit üre Jeschmack, jitz spare mr öch also et Ömtuusche zweschen de Johre. Sescher hatt ür för mech widder, wie meeschtens, Jootsching als Jeschenk jedäht; tuuscht die selver enn, dann kritt ür jarantiert jenau dat, wat ür öch vam Chresskengkche jedäht hatt.
Nevverbei jesäht: üvver dat neue Hemb met Schlips wehd dr Vatter sich och dies Johr widder ärch freue. Die van de letzte drei Johre lijjen noch em Jeschenkpapier em Kleederkass. Wat sall dä och met nem Schlips? Huhmess, Konzäht, oder Kummede han mir all zigg Johre nit mieh om Zeddel.
Kenger, et wöhd Zigg, dat ich Schluss maache, söns verpass ich noch dr Bus. Wann ich retour kumm, jütt et sescher vill ze verzälle.
Jlöcksillije Chressdaach van fähns

Ür stressfreie Mutter