Met oprümme int neije Joahr! von F. v. R.

De Krostreck oprümme int neije Joahr.
On wenn dor immes säht, heij hätt kenn Krostreck, dänn hätt bestemp kennen Hushalt - oder heij lüg. Örges mot me de Krom doch herdun, wat me ut de Hand läg, me kann doch nit alles onder den Kas schuwen oder bowen drop leggen. Överhaupt, dat ös ja so wechtig, en richtig Krostreck ös en Stöck von denn Huussegen. Lüh, die grad getraut sind, hebben noch ken Krostreck - äwer in de derde Wäk fängt dat all aan. Ös dat nit schön, wenn me son Treck hät för de Krosen un de Schommeln? Me kann all ens ömmer drin kieken, wenn me wat verloren hät. Weij schmieten nex weg, we dunt denn Krom en paar Joahr verwahren, on dann wört utsortiert. Nau kömmt de Krom in de Schopp oder op den Sölder. Pass mans op, wat all in son Treck drin ös: dor legge Babbelsches för de Wechter, afgebrokene Greffels on Schlötels, Posseliene Köppkes, Bleipennstömp, en Schieer, Bendels von de Schlobbert, en Fottschnur, Bocksenknööp, Hoornolden, Korsettstangen, Kerzenstommels, sure Brocken in Papier, Bierdeckels, Plättsches von Leähr für de Loffpomp, Riemen för de Klompen, ennen Borschel för de Baseluhn sauber te make, Bocksenklammersch, en Biljet von de Bahn nor denn Drachenfels, leege Pille- on Salvendöskes, Batterien van de Taschenlamp, en alt Portmonei, stöckskes Tau, Gardinneröllekes, en Stöck von de Lofböcks van de Kermes, enen hoop Schruuwen, Vaders alde Hümm, on enne kapotten Notknacker. - Ös dat nex in son grote Treck? Äwel sitt ganz vörsechtig, wenn je de Treck opmaken wellt - bloß nitt de hatt on nitt de gau optrecke. Dann kös sech watt quer setten. On wenn me met Gewalt drahngeht, dann flüch de Treck eruut, on denn ganzen Krom leeht in de Stoov. On dann wört äwel sortiert, opgerümmt on weggeschmeeten, on dann freut me sech, wenn me dorbeij noch en Geldstöck fend. -- Äwer vertien Dag later ös die opgerümmde Treck wer en K r o s t r e c k .